En un prumèr moment, se deishèc ar escolanat explorar eth nau materiau en tot susvelhar es sòns procèssi e orientar-les quan calie. Auien caishes de carton de diferents colors e tamanhs, tables de husta miejanes, pèires de disparièrs colors, formes e mesures e coma elements naturaus tanben i auie carrolhes.
En aguest ambient des construccions, as escolans e escolanes d’educacion infantila les calie resòlver petiti reptes coma per exemple:
- Bastir un pònt de manèra qu’eth veïcul escuelhut podesse passar per dejós e per dessús.
- Montar ua rampa entà que s’esguilèsse ua pilòta e dempús montar-ne dues entà observar per quina baishaue mès rapid.
- Bastir es cases tàs animaus que cadun auie escuelhut.
- Representar en papèr es bastisses realizades en petit grop, eca.
Coma tostemp començauem es sessions en tot explicar quini èren es ahèrs e fin finau en un rondèu entà compartir experiéncies e aprendissatges entre toti: qué ei çò que mès les auie agradat, çò que mens, çò que mès les auie costat, aquerò qu’ auie estat mès facil de hèr,….e es sòns rasoaments. Ath madeish temps tanben aprenien, pòc a pòc, a resòlver es sòns problèmes relacionaus en tot parlar.
Hènt, des.hènt, acertant, en tot enganhar-se, solets, en companhia, jogant, reflexionant, damb guida o sense ,….non i a manèra de parar es sues ganes d’apréner.
