Eth passat diuendres, dia 18 de deseme ena tarde, arribèc sa Majestat eth Patge des Reis Mags d’Orient a cercar es cartes.
Saludèc a toti des deth carrèr en tot qu’es escolans/es guardauen pes hièstres e dempús mos amassèrem en pati dera escòla en tot respectar es distàncies de seguretat.
Eth discors deth patge siguec fòrça precís, en tot saber tot çò qu’a passat ena escòla pendent aguest darrèr trimèstre. Tota era mainadèra escotèren damb fòrça atencion es comentaris des Reis Mags.
En acabar era lectura, es mainatges e mainades dera escòla cantèren es nadales assajades tara ocasion:
Educacion Infantila:
- Grilhonet
- Ara ve Nadal
Cicle Iniciau:
- Pastors e pastoretes.
- Rock de Nadal
Cicle Miei:
- Sense tu
- Un año más
Cicle Superior:
- We wish you a merry Christmas
- Vive le vent
Ara seguida, entreguèren es cartes damb es boni desirs a nivèu de grop-classa: que toti es mainatges deth mon agen joguets, que s’acabe eth coronavirus, apréner a suenhar era planèta, poder botjar-nos pes pòbles tà amassar-nos damb amics e familia, que toti es mainatges e mainades deth mon agen minjar, qu’es persones malautes de covid-19 se guarisquen, qu’era rotina se convertisque en sorpresa, es enfadi en rialhes e era tristor en esperança, poder balhar aguesti presents tan coma receber-les, crear un mon de patz pr’amor qu’un aute mon ei possible, parlar mès en aranés e en catalan, que totes es persones agen companhia e moltes abraçades virtuaus e, que pogatz veir era nòsta rialha a travès des nòsti uelhs.
Fin finau, acomiadèrem ath patge damb un fòrta trucada de mans en tot dar-le es gràcies pera visita e vrespalhèrem chicolate caud aufrit pera AFA dera escòla.
Gràcies pera visita e enquiar an que ven!!
Gràcies AFA!!
