Aguest cors, eth CDA d’Esterri d’Àneu mos premanic era activitat que seguís:
Era activitat Els Guardians de la Primavera ei ua prepausa pensada tà qu’era mainadèra s’apròpe as cambis dera sason en tot combinar sciéncia, imaginacion e exploracion en miei naturau.
1.- Ua aventura entà descorbir es secrets dera primauera.
Era activitat comence damb eth conde dera marmòta Carlòta, en tot seguir damb es missatges des Guardians dera Primauera: uns èsters magics qu’an de besonh ajuda entà descorbir es secrets amagadi en bòsc. A compdar d’aquiu, cada escolan/a receb eth sòn carnet dera Primauera, qu’a d’anar completant ath long deth recorrut en tot superar diferents pròves e rèptes d’observacion.
2.- Eth holet deth solei e era energia dera vida.
Ua des parades ei dedicada ath solei e ath sòn papèr essenciau tàs ecosistèmes. Era mainadèra experimente damb era calor deth solei e era ombra, observant com cambie era temperatura segontes er espaci a om se trapen. Tanben se parle de tot çò qu’an de menèster es plantes entà créisher: lum, aigua e neuriments. Comprenen atau, qu’eth solei ei ua pèça clau entà desvelhar era vida dempús der iuèrn.
3.- Eth gigant des arbes e eth desvelhar deth bòsc.
Damb era ajuda deth gigant des arbes, era mainadèra se fixe en brots trendes e enes huelhes naues qu’apareishen ena primauera. Tocant es branques, observant arbes der entorn en tot comparant-les, descorbissen que son diferents: n’i a que perden es huelhes en iuèrn e d’auti que les mantien tot er an.
Tanben representen damb eth sòn còs es cambis dera sason en tot convertir-se en arbes dromidi pendent er iuèrn que, lentament, se desvelhen damb era arribada deth bon temps.
4.- Er esperit des petals e es insèctes pollinitzadors.
Ena parada des flors, es escolans/es se convertissen en petiti detectius dera natura. Damb lupes e targetes de colors observen flors de diferents tonalitats e cerquen insèctes que s’apròpen.
A compdar d’aguestes observacions s’introdussís, d’ua manèra fòrça vivenciau e adaptada ara sua edat, era idia dera pollinitzacion: per qué es flors an colors vius e quin papèr jòguen es insèctes ena reproduccion des plantes.
5.- Era elfa des sons e era musica dera primauera.
Era primauera tanben se pòt escotar. Damb era elfa des sons hèm silenci entà identificar es sons der entorn: audèths, vent, aigua e d’auti tapatges deth bòsc.
Era mainadèra detècte qu’ena primauera molti audèths canten pr’amor que cerquen parelha e bastissen eth sòn nin. Fin finau, semble un petit concèrt de primauera com ua orquèstra formada pes sons dera primauera.
* Apréner observant, jògant e imaginant.
Atau passèc un maitin plen de jòcs, curiositats e descubèrtes, en tot demostrar qu’era natura ei un espaci ideau entà apréner a observar, escotar e hèr-se preguntes sus eth mon que mos entornege.
Pr’amor que soent, es grani aprenedissatges comencen damb causes senzilhes com campar ua flor, escotar un audèth o sénter era calor deth solei ena peth.
Gràcies a tota era equipa deth CDA e especiaument a Estel i a Neus!!
