Planvoludes familhes,
Ja mos trapam ena siesau setmana de confinament enes nòstes cases. Prumèr de tot demoram que vos trapegatz ben de salut, vosati e toti es que vos estimatz.
Sabem que cada casa ei un mon diferent, des des centres volem contunhar dant-vos supòrt a toti vosati, sustot as mès petiti.
Coma ja sabetz eth 14 d’abriu s’inicièc eth tresau trimèstre entàs nòsti escolans.
Directrius Departament d’Educacion
Deuant dera situacion d’ampliacion deth confinament, eth Departament d’Educacion ditz que mos cau dar continuïtat ara activitat formatiua entà ajudar a mantier es abitudes e eth procès d’aprenedissatge entà qu’arriben a tot er escolanat.
Garantir era comunicacion damb es escolans e es familhes per miei deth seguiment de tutories e supòrt emocionau ar escolanat e as familhes, especiaument en cas d’escolans que presenten mès dificultats ara ora de participar enes activitats prepausades. Es directrius que mèrque eth Departament dauant era prepausa educatiua que s’a d’aufrir ei qu’a d’èster ua prepausa globau, a on se prepausen ahèrs globalizadi en diuèrsi ambits curriculars. Se recomane hèr prepauses setmanaus, des des diuèrsi ambits curriculars, damb un calendari d’entrega e damb era possibilitat de hèr un retorn des activitats realizades pes escolans, entà melhorar eth sòn aprenedissatge. Aguesta interaccion s’a de poder garantir per miei de diuèrsi miejans, ja sigue corrèu electronic, entorns virtuaus, … que permeten enviar documents digitaus o fotografies des ahèrs. Es ahèrs, projèctes, rèptes, activitats… anaràn acompanhadi deth supòrt deth mèstre.
En quinsevolh cas, es ahèrs realizadi pendent eth confinament an d’èster tasques entà complementar era avaluacion des escolans, jamés serà ua penalizacion, tient en compde que non se pòt garantir que toti es escolans agen es madeishes oportunitats.
Coma ZER auem decidit de trabalhar toti en ua madeisha linha, tient en compde es caracteristiques de cada centre e era diuersitat d’escolans e situacions que mos trapam.
Cada setmana mès o mens vos arribaràn es ahèrs entàs escolans damb ua data d’entrega. Serie bon que se respectèsse, mès se i a bèth escolan a qui le cau mès temps, se pot informar as mèstres entà ampliar-lo.
Cada tutor/a mantierà canals dubèrti damb eth sòn grop (corrèu electronic, g-suite, whatsapp..), amassa damb eth claustre, entà poder hèr eth seguiment e arremassar es ahèrs qu’es escolans retornen e tanben entà resòlver dubtes.
Entà quinsevolh question restam ara vòsta disposicion.
Tot anarà ben, mos vedem lèu.
Salutacions,
Equip directiu dera ZER Val d’Aran.
