Es escolans de Cicle Iniciau dera Escòla Ruda auem auut era sòrt de poder participar en Projècte muralista d’artMoniom. Artmoniom ei ua plataforma culturau on se connècte art, territòri e comunitat a trauès deth muralisme e deth land art. Eth projècte s’a desvolopat en diferenti espacis aranesi e centres educatius, en tot cercar er apropament der art ara natura e as abitants dera Val d’Aran.

Meritxell e Albert mos an acompanhat en aguesta aventura, en tot premanir-mos entà realizar era intervencion muralista en recinte dera piscina de Salardú damb er artista Swen Schmitz.

Meritxell mos introdusic en procés en tot dinamizar es activitats prèvies ara produccion finau. Mos presentèc ar artista Swen Schmitz, en tot mostrar-mos es sues òbres d’art muralista e connectar-mos damb eth en ua video-conferéncia. Dempús, es escolanes auerem era oportunitat d’expressar era nòsta creativitat en tot realizar ua òbra de land art en bòsc de Salardú. Açò mos servic d’inspiracion entà pintar eth nòste murau collectiu, ena escòla, qu’ath madeish temps servic d’inspiracion entà Swen. Finaument, realizèrem es darrères sessions deth projècte en recinte dera piscina municipau de Salardú, on collaborèrem ena intervencion muralista de Swen, en tot ajudar-lo a pintar diferentes parts dera òbra.

Gràcies, artMoniom, per deishar-mos participar en aguesta iniciativa! A estat fòrça enriquidora.